Pjata kryesore 31 Dhjetor 2021

Kush nuk ka qejf përsheshin duhet të provojë gjelin e detit të mbushur me gështenja

Pjata kryesore

Nga: Linda Fishta

Foto: Armand Habazaj

PËRBËRËSIT: 1 gjel/pulë deti rreth 3.5 kg, 350 g gështenja të ziera ( të qëruara dhe të grira në thërrime), 3 qepujka ose qepë të vogla, 250 g pançetë e prerë në copa të vogla, 30 g gjalpë, 3 lugë majdanoz i grirë, një degë trumzë, 2 gjethe sherbele të grira imët, 1/2 lugë e vogël me erëza: arrëmyshk, kanellë, xhenxhefil pluhur, karafil pluhur, 300 g salsiçe të freskëta, 2 grushte fëstëkë të qëruar, 1 mollë jeshile e qëruar dhe e prerë në kubikë të vegjël, 30 g djathë Parmigiano i grirë 2 feta buke për tost, të grira në thërrime të vogla (u kemi hequr koren më parë) kripë e piper sipas nevojës, 1 limon ½ qepë e qëruar, por e paprerë 10 feta pançete për të mbuluar gjelin ose pulën gjatë pjekjes, 50 g gjalpë për të lyer gjelin, 1 gotë verë e bardhë

PËRGATITJA: Një ditë më parë gjelin e spërkasim me ½ lugë kripë në gjithë sipërfaqen dhe brenda barkut. Pastaj, me gjysmë limoni fërkojmë të gjithë sipërfaqen e tij për dy minuta duke e masazhuar mirë. E spërkasim me ½ lugëkripë tjetër, e mbështjellim me plastmasë kuzhine dhe pasi ta vendosim në një tavë, e lëmë të pushojë 24 orë në frigorifer. Nëse nuk keni kohë, anashkalojeni këtë, lyejeni me kripë e limon, por mos e lini në frigorifer. Në një tigan hedhim
gjalpin dhe skuqim qepujkat/qepët, salsiçet, dhjamin e gjelit dhe pançetën për pak minuta derisa qepa të bëhet transparente. E hedhim në një tas dhe pasi të shtojmë gjithë përbërësit e tjerë, përfshirë mollën e fëstëkët, i përziejmë me dorë. E ruajmë në frigorifer, të mbuluar me plastmasë kuzhine.

TË NESËRMEN: Një orë para se ta gatuajmë, nxjerrim nga frigoriferi gjelin dhe mbushjen. Ndezim furrën në temperaturën 180° C. E thajmë brenda dhe jashtë gjelin me letër thithëse kuzhine ose një pecete të pastër. Lyejmë me gjalpë barkun e tij nga brenda, e mbushim me harxhin dhe vendosim ½ qepë në fund (si një tapë), që mbushja të mos dalë gjatë pjekjes. Lidhim këmbët e gjelit me spango dhe i mbështjellim me letër alumini që të mos digjen. Lyejmë gjelin me gjalpë sipër, por dhe poshtë lëkurës së tij. E vendosim në një tavë me barkun lart, e mbulojmë me fetat e pançetës dhe shtojmë verën. E pjekim në temperaturën 180° C për 20 minuta në pjesën e poshtme të furrës dhe më pas e ulim temperaturën në 165° C dhevazhdojmë pjekjen e tij edhe për rreth 2.5 orë, duke e lagur herë pas here me lëngun që është krijuar në tavë. Nëse është nevoja, shtoni pak ujë të valuar. 5Pas kësaj kohe, e kontrollojmë nëse është pjekur duke eshpuar te kofsha. Nëse del lëng i bardhë, mishi është gati. Kur ta shërbejmë, heqim qepën që kishim vënë te barku, e presim gjelin në copa dhe në çdo pjatë vendosim një copë mishi dhe pak nga mbushja. Mund ta shoqëroni dhe me pak brokoli dhe karota të vogla të ziera më parë dhe të skuqura në tigan me pak gjalpë e kripë, për t’i dhënë pjatës akoma më shumë ngjyrë.

ARTIKUJ TE NGJASHEM

  • Javor
  • Mujor
  • Vjetor