Dekorime 21 Tetor 2020

Një botë me ngjyra dhe risi brenda BOOKLAND, arkitektja Ingrid Martini tregon si ideoi librarinë më IN në Tiranë

Dekorime

Përshkrimi nga Martini Design Studio mbi projektin Libraria Bookland. 

Sfidën për të dizajnuar një librari e pranova me shumë kënaqësi. Një tipologji kaq e rrallë interieri, e më tepër në një vit të çuditshëm si ky, nuk vjen shumë shpesh. Ndaj e pranova me shumë dëshirë.

Mbi të gjitha, jo vetëm që rastisi të jetë një tipologji shumë e veçantë interieri, por edhe vetë struktura e ambientit ishte shumë e pazakontë. Planimetria ka një formë atipike: nuk ka mure kënddrejta me njëri-tjetrin dhe shfaq një vetratë të madhe të orientuar në jug-perëndim që e bën praktikisht të lundrojë në dritë. 

Ndërkohë prezenca e dy kolonave konstruktive, të dyja në mes të hapësirës, ishte një disavantazh që u përpoqa ta kthej në lajtmotiv të interierit. Forma e tyre rrethore frymëzoi edhe harqet mbi dhe poshtë rafteve të librave.

Paleta e ngjyrave që Martini Design Studio zgjodhi të përdorë te libraria Bookland, është një kombinim i tre nuancave pastel të së verdhës, kaltrës dhe rozës.

Plani i shfrytëzimit të librarisë është konceptuar në mënyrë që të përfshijë edhe disa kënde për qëndrimin ulur, për të rritur dhe fëmijë. Pra, është një  koncept bookstore, i ndryshëm nga libraritë tipike të qytetit tonë, ku jo vetëm mund të shëtisësh ndër rafte dhe të shfletosh, por edhe të ulesh e të lexosh apo vizatosh me qetësi nëse ke dëshirë.

Përtej vetratës së gjatë ndodhet një verandë e bollshme, e gjelbëruar dhe e ndriçuar, ku mundet gjithashtu të ulesh të shfletosh dhe ta shoqërosh leximin me një filxhan çaj apo kafe. Nuk ju mbetet veçse të vizitoni librarinë  Bookland, që ndodhet në katin e tretë të galeria tregtare ETC.

ARTIKUJ TE NGJASHEM

  • Javor
  • Mujor
  • Vjetor