Aktualitet 26 Shtator 2019

Agjencia Kombëtare e Barnave u bën thirrje pacientëve: Mos e blini këtë medikament!

Aktualitet

Agjencia Kombëtare e Barnave dhe Pajisjeve Mjekësore ka njoftuar të gjithë pacientët, por edhe profesionistët e shëndetit që të mos rekomandojnë një medikament me emrin “Ranitidinë”.

 

Sipas një njoftimi në faqen e tyre zyrtare të kësaj agjencie, alarmi vjen nga SHBA, ku pas disa testeve laboratorike, është zbuluar se në përmbajtje të këtij medikamenti ka lëndë që klasifikohen si kancerogjene.

 

Prandaj Agjencia e Barnave ju kërkon pacientëve që të mos e marrin një bar të tillë dhe të gjithë ata që trajtohen me këtë medikament të rekomanduar nga mjeku, duhet të këshillohen me mjekun për të marrë një mjekim alternativ.

 

NJOFTIMI

Në faqen zyrtare të Administratës Amerikane për Barna dhe Ushqime (FDA-Food and Drug

Administration) si dhe të Agjencisë Evropianë të Barnave (EMA- European Medicines Agency) është publikuar njoftimi lidhur me përmbajtjen e lëndës N-Nitrosodimetlamine (NDMA), papastërti e gjendur në barna me lëndë aktive “Ranitidine” duke përfshirë këtu edhe barin “Zantac”. “NDMA” është një lëndë që klasifikohet si kancerogjene, bazuar në disa teste laboratorike të kryera.

Për momentin ka pasur vetëm tërheqje vullnetare nga tregu, nga disa prej firmave që janë prodhuese dhe distribuese të këtij bari.

Agjencia Kombëtare e Barnave dhe Pajisjeve Mjekësore njofton profesionistët e shëndetit si dhe pacientët për këtë efekt anësor të rëndësishëm në barin me lëndë aktive “Ranitidinë”.

Njoftimi është bërë edhe për Urdhrin e Farmacistit të Shqipërisë si dhe Urdhrin e Mjekut në mënyrë që për barin e rekomanduar apo përshkruar të jepet informacion për efektet anësore që mund të shfaqen tek pacienti.

 

Këshillohen pacientet që:

1. Nëse e marrin “Ranitidinë” si bar pa recetë, pra me vetëmjekim, mund të zgjedhin një bar tjetër që jepet pa recetë dhe që përdoret për shqetësimin shëndetësor që ata kanë.

2. Nëse e marrin “Ranitidinë” me recetë, dhe duan ta ndërpresin marrjen e saj, duhet të flasin me mjekun personal në mënyrë që ai t’iu përshkruajë një mjekim tjetër opsional.

Profesionistët e shëndetit janë të lutur që të përdorin formularin e raportimit në faqen zyrtare të Agjencisë Kombëtare të Barnave dhe Pajisjeve Mjekësore, për çdo efekt të padëshiruar që ata mësojnë, lidhur me barin në fjalë, ose dhe barna të tjera, dhe ta dërgojnë atë në adresën: [email protected]

ARTIKUJ TE NGJASHEM

  • Javor
  • Mujor
  • Vjetor